النوُنّه هتاكل إيه؟.. د. خالد مقلد يُجيب 1 - 2
النشرة البريدية من جريدة الطبيب
سجل بريدك هنا ليصلك جديد الأخبار من جريدة الطبيب
النوُنّه هتاكل إيه؟.. د. خالد مقلد يُجيب 1 - 2
الأربعاء 04 ربيع الأول 1439 هـ - الاربعاء 22 نوفمبر 2017 م      07:48:46 AM

دائماً الناس بتستخدم كلمة الفطام (Weaning) مع منع إرضاع النونة و لكن كلمة الفطام تشمل أيضاً مرحلة إطعام النونة طعام جديد مع لبن الأم، والهدف من هذة المرحلة من الفطام منح النونة نمو جسدي و عقلي بمكونات غذائية غير متوفرة معظمها في لبن الأم بعد الشهر السادس و في نفس الوقت تمهيد للفطام النهائي وهو وقف الرضاعة نهائيًّا، معنى كلامي أن الأكل جنب الرضاعة لحد الفطام النهائي إللي هو تقريبًا بداية من إتمام النونة ٢١ إلى ٢٤ شهرًا على حسب فترة الحمل كانت كاملة أو الولادة كانت مبكرة و برضو أحيانًا النونة من تلقاء نفسه يفطم نفسه.

أهم نصائح قبل ما أقولك تأكلي نونتك إيه لأن جداول أكل النونات منتشرة و مالية الدنيا للي عايز يجيبها لكن فن الإطعام مش هتلاقيه.

* لازم تتعاملي مع نونتك برغم صغر سنه إنه بني آدم ناضج و له ذوق في الأكل يعني مش أي خلط أكل على بعضه و نحشر في بقه و خلاص!

* مرحلة التّذوق دي مهمة جداً ممكن النونة يرفض الأكلة الواحدة كذا مرة معاكي لحد ٢٠ مرة و بعد كدة تستغربي لما تلاقيه بقى يأكلها عادي.

* إزاي تخليه يتذوق ؟ على طرف المعلقة حتة صغيرة و تخليه يذوق الأول بلسانه كأنك بتعوديه عليها و من عينيه و حركة بقه تعرفي عجبه ولا لأ.

* طب ليه بنعمل كدة ؟ نتفادى إن نديله كمية أكل كبيرة و مش عجباه هيعمل حاجة من إتنين هيرجعها (يتقيأ) أو يحوش الأكل في بقه و يشرق.

* فيه نظرية علمية بتقول "كل فعل له رد فعل مساوي له في المقدار و مضاد له في الإتجاه"

كل ما الأم تحشر الأكل في بق النونة عافية هتلاقيه راح مرجعه و طبعاً الأم هتتنرفز و تقوم ضرباه ع إيده و تقوله كدة كُخة! فهم إيه الطفل بقى!؟ إن الأكل هو إللي كُخة ،، متشكرين يا ماما!

* الأكل لازم بالترغيب و يكون شكله حلو و له ألوان جذابة و الكوباية أو الطبق و المعلقة شكلهم حلو و جذاب و دلع كدة ،، هم يا جمل و حبيب ماما هياكل إييييه ؟ و العربية داخلة الجراااااچ،، والله بجد مش بهزر لازم كدة

* موضوع ضرب الأكل في الخلاط ده أنا شخصيًا رافضه و مش بحبه بالرغم إن في أطباء تانية بتوصفه ،، بس أنا عندي فكرة تذوقيه إنتي كدة و شوفي هتسمعي كلامي أنا والا هُمَ.

* طب نعمل إيه مكان الخلاط ؟؟ فيه بعد الأكلات إللي ممكن تتسلق جامد لحد ما تتهري أو نهرسها بالمعلقة بتفضل محافظة على طعمها الجميل الحلو و بألف هنا و شفا

* المشروبات و العصائر يفضّل تقديمها في كوباية و نشرب النونة بالمعلقة من الشهر ٧ إلى ٩ و بعد كدة ممكن يمسك الكوباية إللي ليها بزبوز دي و يشرب لوحده.

* بلاش نحط أي سوائل دافئة أو مشروبات في البيبرونة و نديهم للنونة ،، كدة بتعوديه على رضاعة حاجة تانية غير ثديك و هتبقى بالنسبة له أسهل و يلاقي صعوبة و يزهق و هو بيرضع طبيعي من ثديك.

* إستخدام المعلقة و الكوباية بينمي عند النونة القدرة على البلع علشان بعد كدة لما نأكله أكلات ناشفة شوية تبقى المسألة سهلة و ما يشرقش و ما يزورش.

أضف تعليق
: الإســـــــــــــــــــم
: عنــــوان التعليق
: البريد الالكترونى
: التعليــــــــــــــــق
الأكثر قراءة

جميع الحقوق محفوظة لجريدة الطبيب الألكترونية 2012
تصميم وبرمجة مؤسسة الطبيب للصحافة والنشر