النشرة البريدية من جريدة الطبيب
سجل بريدك هنا ليصلك جديد الأخبار من جريدة الطبيب
د. خالد مقلد يكتب عن أنيميا الفول .. ماله وما عليه "1"
الأحد 19 صفر 1440 هـ - الاحد 28 أكتوبر 2018 م      06:43:06 PM

أنيميا الفول هذة العبارة الدارجة بين عامة الناس رمزًا لإحدى أمراض فقر الدم و تناقلتها أجيال وراء أجيال و هى عبارة إلى حد ما غير صحيحة بنفس اللفظ هكذا و لكن إسمحولي نعرفها بإسمها الصحيح؛ ال Favismهى أنيميا البقوليات!

- يعني إيه يا دكترة؟!

= يعني مش الفول بس السبب فيها و لكن كل عائلة البقوليات زي؛ العدس، الفاصوليا، البازلاء، الفول الحِراتي وأحيانًا بعض المكسرات وأكلات زي الطعمية و البصارة إلخ.

- يااااااه يا دكترة! طب يعني كدة فرقت؟!

= أه طبعًا فرقت كثيرًا جدًا، لإن الأم متخيلة إن الفول بس هو السبب فَلَو مثلًا أكلت إبنها و واخد بالك من كلمة إبنها دي؟!

حُط تحتها ألف خط ____ الأولاد محتاجين تركيز أكثر!

لو أكلته أي نوع بقوليات و إبتدا يتعب قدّامها ممكن تتخيله تعب عادي و بالذات لو بيصاحبها آلام في البطن و ممكن تتعامل معاه على إنه مغص من الأكل و تطنش و الحالة هتسوء بالطبع.

لإن بالمناسبة كمان هذا الداء يكتشف في مجتمعنا بمحض الصدفة في أغلب الحالات و نادرًا من يعمل تحليل هذا الچين للمولود إلا المقتدرين ماديًا و متابعين مع أطباء نساء و توليد أثناء فترة الحمل أو مع أطباء أطفال منذ الولادة.

ده غير كمان ممكن الأم لو ما تعرفش معلومة البقوليات دي و عرفت بس إن أنيميا من الفول فقط ممكن كل شوية تأكله بقوليات و يتعب.

و طبعًا هتسألني طب مأهو تعب أول مرة و راح المستشفى و كان لازم الدكتور إللي عالجه يعرفها؟!

هأقولك صح طبعًا و في الغالب الدكتور بيقعد معاها و يعرفها الحالة و كل الممنوعات من الأكل والأدوية.. بس خلينا نلتمس العُذر و جلّ ما لا يسهو ثم ممكن يكون طبيب إستقبال في مستشفى ريفي غير مُلم بكل الأمور و تنقصه المعلومة أو لم يتذكرها.

و بعدين خلينا ننشر المعلومة من باب التثقيف الطبي و إللي لسة ما أكتشفت حالة إبنها تأخذ بالها،،

- ياااااااه يا دكترة ده الموضوع طلع كبير ع كدة!!

= لأ ولا كبير ولا حاجة ده أبسط مما تتخيل و تعالي كدة نأخذ فكرة عنه و أسبابه و طرق علاجه والتعامل معه و نسبة شفاءه.

*مبدأيًا هذا الداء كان يأتي في الأطفال الذكور (الأولاد) فقط و قليلًا  ما يأتي للأناث (البنات).

كُنَّا زمان بنقول إستحالة يجي للبنات لكن تم تسجيل حالات و أهو حصلت علشان كدة ما بقناش نقدر نقول كلمة إستحالة.

*المرض سببه نقص چين معين إسمه G6PDو المرض يُسمى Favismوإسمه العلمي

Glucose-6-Phosphate Dehydrogenase Deficiency

إختصاره العلمي G6PDD

ده بيحصل نتيجة طفرات چينية و وراثي ينتقل من الأم حاملة المرض و التي لا تعاني منه لطفلها أو الأب المريض لإبنته لتصبح حاملة للمرض و مش شرط تعاني من أعراضه،،

*و هو داء في التمثيل الغذائي عند الطفل يعني جسمه ما بيقدرش يكسر بعض المواد الغذائية إللي موجودة في البقوليات فبتعمل حالة أكسدة ع كرات الدم الحمراء و تضعفها فتصبح لها قابلية أعلى للتكسير،،

*ع فكرة لو الطفل لم يأكل بقوليات ولا كأنه عنده مرض!

*بيحصل إيه بقى لما الطفل بيأكل فول بِمَا إنه أول البقوليات إللي ممكن تدخلها الأم مع الرضاعة بعد الشهر السادس لذلك إرتبط إسم الداء بالفول،، يحصل تكسير في كرات الدم الحمراء و بالتالي يخرج منها الحديد و يتسرب في باقي الأوعية الدموية و بالتالي ينخفض مستوى الحديد (الهيموجلوبين) و لذلك تسمى أنيميا.

*طب نعرفه إزاي بقى؟ دائمًا بيصاحب الحالة عند حدوثها شحوب في الوجه و أحيانًا مع إصفرار واضح و غالبًا في العين زي حالة الصفراء بالضبط، و بيجي معاها صعوبة شوية في التنفس لإن الهيموجلوبين هو إللي بيشيل الأُكسچين فبتلاقي الطفل زي إللي عمَّال يلقف الهواء، غمقان وإحمرار البول، سرعة نبضات القلب، ألم في البطن، دوخة والشعور بالتعب والإجهاد، والحاجة المميزة أوي الشعور بألم في القدمين.

*بالمناسبة الأعراض مش شرط تظهر بعد الأكل مباشرةً لكن ممكن بعدها بكام يوم و للأسف ساعات بعض الأمهات بتبقى نسيت أكلت الطفل إيه والأسرة تدخل في متاهات لكن طبعًا الطبيب بيشخص الحالة علطول.

- طب هل البقوليات بس السبب الوحيد يا دكترة؟

= للأسف لأ أحيانًا لو فيه عدوى ميكروبية ڤيروسية أو بكتيرية ممكن تسببه و بعض الأدوية لعلاجها و بعض المسكنات و من أشهر هذة الأدوية؛ السلفا والأسبرين و بعض أدوية الملاريا والسُل و بعض مضادات الحساسية و علشان كدة ممنوعين منعًا باتًا.

*الجرعات العالية أوي من ڤيتامين Cلو حقن وريدية.

وأحيانًا في بعض الحالات الحساسة أوي الليمون والبرتقال.

*و كمان نخلي بالنا من النفتالين ما يبقاش في متناول الأطفال لإن بعض الأمهات بتضعه في أرضية الدواليب و "العيال مش بتبطّل نكش ههههههههه".

*الملحوظة المهمة إن أي طفل لسة مولود و طولت معاه الصفراء و بالذات لو حصل معها تشنجات يفضّل نعمله تحليل الچين علشان نعرف عنده هذا الداء وَلا لأ.

*طيب إيه بقى العلاج؟

•مبدأيًا تفادي كل الأكلات والأدوية المسببة لظهور الحالة.

•التطعيمات الإجبارية والإختيارية لتفادي حدوث الأمراض التي تحفز ظهور الحالة وبالذات الإلتهاب الكبدي.

•جرعات منتظمة من حمض الفوليك و ڤيتامين Eو السيلينيوم و دي مقويات و مضادة للأكسدة تحافظ نسبيًا ع مقاومة كرات الدم الحمراء ضد التكسير و دي موجودة سواء في شكل دوائي أو بعض الأغذية الطبيعية مثل؛ الفواكة الأڤوكادو والتفاح و نسبيًا الموز والخضروات الخضراء زي الجرجير والسبانخ والبروكلي بالإضافة للطماطم والجزر والبصل وأيضًا زيت الزيتون و الأسماك والسلمون واللحوم الحمراء والماشروم.

•نقل الدم هو السبيل الوحيد في علاج الحالة وقت حدوثها.

•لا قدر الله في حالة الإهمال الشديد للحالة و دخولها في فشل كلوي هيبقى لازم عمل غسيل كلوي.

•بعض الحالات المستعصية بنشيل لهم الطحال و ده إجراء بيحصل في كثير من أمراض الدم والطفل بيعيش حياته طبيعي جدًا من غير الطحال و بيكبر و بيتجوز و يخلف عادي جدًا.

أضف تعليق
: الإســـــــــــــــــــم
: عنــــوان التعليق
: البريد الالكترونى
: التعليــــــــــــــــق
الأكثر قراءة

جميع الحقوق محفوظة لجريدة الطبيب الألكترونية 2012
تصميم وبرمجة مؤسسة الطبيب للصحافة والنشر