كثيرًا من المتزوجين حديثًا ومع طفلهم الأول بيكون شعار المرحلة بتاعهم إلحقونا الطفل عنده إمساك وغالبًا طبعًا الأم هى من تُطلق هذا الشعار بحُكم إنها أكتر واحدة مهتمة بالرضيع لكن مش بيفوتها طبعًا تُشرك زوجها معها و ياريتها ع قد كدة ده كل واحد فيهم بيكلم مامته يشكي لها و العيلة كلها مبقاش وراها غير مشكلة إمساك النونو طَب خلينا نقول بعض المعلومات نساعدهم يهدوا أعصابهم شوية.
مبدئيا أول يومين بعد الولادة يبقى الإخراج عند الرضيع كثيرًا ولونه إسود بنسميه تنظيف البطن و بعدها بيبقى اللون فاتح و بيبقى تقريبًا مع كل رضعة لمدة أسبوع أو إتنين لدرجة إن الطفل يرضع وهوعلى حجر مامته ويعمل إخراج لأن الفترة الأولى بتكون لسه خلايا الغشاء المبطن للمعدة لم تنضج وهى المسئولة عن امتصاص الغذاء علشان كدة مهم جداً رضاعة الطفل من أول ساعة بعد الولادة و الاهتمام بإرضاعه "لبن السرسوب" إللي بينزل من ثدي الأم أول أسبوع و بنسميه بالبلدي كدة "مسمار البطن" علشان بيمسكها بعد كدة المفروض عملية الإخراج بتقل و بتبقى في المعدل الطبيعي مرتين أو ثلاثة في اليوم و كل لما يعدي شهر ممكن تقل مرة وممكن عند سن شهرين تلاقي الطفل بقى بيعمل إخراج يوم بعد يوم أو كل ثلاثة أيام كل ده طبيعي علشان بيبتدي يستفيد من التغذية و جسمه بيكبر.
طَب إمتى نبدأ نقلق و نقول ده إمساك ؟ مبدأيًا طالما لم نتخطى الإسبوع بدون إخراج لا نقلق لكن برضو لازم نتابع و نشوف في إيه غلط ممكن تبقى عدد و كمية الرضاعات قليلة و ده نتابع معاه الوزن و نشوف الطفل وزنه بيزيد وَلّا لأ وده بيكون مؤشر كويس جدًا، الحاجة الثانية فيه بعض الأمهات بتبدأ تأكل الطفل بدري وممكن الأكل ده يجيب إمساك زى الأكلات اللي فيها مركبات الحديد أو الجزر مثلاً بيمسك البطن ،، فياريت نلتزم بجدول تغذية الرُضع و لا نبدأ نأكله قبل إتمام الشهر السادس ،،
لكن الإمساك لو تعدى أسبوع أو عشرة أيام لابد من سؤال الطبيب المختص و سيكشف عليه و يشوف لو محتاج فحوصات أو أشّعة ،، فيه أمهات بتقلق من الإمساك و تقول ممكن يكون عيب خُلقي مولود به ده وارد طبعًا بس مش حالات كثيرة و بيبان من أول أيام مش بعد شهور لكن وارد برضو يحصل إنسداد معوي بعد فترة و ده له أسباب كثيرة متعلقة بالإمعاء و تقسيماتها داخليًا و ممكن الأعصاب المغذية لها و ده بيبان بالأشعة ولها علاجات ناجحة جدًا.
فيه بقى مساعدات نقدمها للطفل إللي بيتأخر شوية في الإخراج أو بيتألم ممكن بعد الشهر السادس نعطيه عصير برتقال بيسهل عملية الإخراج أو كوسة مسلوقة أو بعد سنة ممكن لبن بقري بارد بيسهل برضو لكن في الحالات الشديدة ممكن نعطيه معلقة لاكتيلوز ملين و ميزته إنه طبيعي.
و ياريت بلاش الحاجات إللي بيعاقب عليها القانون زي ورقة متعاصة زيت أو ترموميتر ،، ممكن تكوني شوفتي طبيب إستخدم ترموميتر قبل كدة بس دي ليها ظروفها إحياناً بيتولد أطفال عندهم إنسداد في فتحة الشرج والطبيب بيفتحها .
و أنا كمان ضد اللبوس الملين خالص و دي وجهة نظري شخصيًا ممكن غيري يوافق لكن بأشوف إن الطفل ممكن يتعود عليها لحد ما يكبر و تبقى مشكلة و بيبني علاقة سيئة بين الطفل ومامته و بيخاف منها لما تيجي تلمسه و ممكن كمان يأثر على فتحة الشرج من فرط الاستخدام.
فيه بقى مراحل عُمرية مختلفة بيجي للطفل فيها شبه إمساك و هى من سن ٤ إلى ٨ سنوات وهنا بيعمل كل ٣ أو ٤ أيام و ممكن بالأسبوع و ده غالبًا بيبقى قلة تغذية مع فرط الحركة و النشاط و الطفل بيحرق الأكل و أحيانًا بيكون عامل سيكولوچي الطفل بيخاف يدخل يعمل إخراج أو فيه حاجة بتألمه و هنا ممكن نهديه و ندهن له مخدر موضعي لحد ما يتعود إن الإخراج مش بيوجعه وده طبعًا بعد استبعاد أي سبب عضوي أو انسداد معوي يكون السبب وغالبًا الإشارة لنا بتكون القئ المتكرر بعد كل أكلة.
نصيحة عامة بقى اعملوها مع كل الأطفال في كل الأعمار عودوهم يكون فيه ميعاد مع الإخراج يعني يدخلوا الحمام يجربوا هيعملوا وَلّا لأ ده هيساعد كتير إن الإخراج ميبقاش صعب بسبب إن ال "Stool " بقى ناشف و كمان بيهئ أو يبرمج الجهاز العصبي على ميعاد محدد للإحراج.
#ملحوظة؛ المقال يعبر عن وجهة نظري لما تعلمته و مارسته في حياتي الدراسية و العملية و قد يكون هناك بالطبع من هو أعلم مني وأفضل مني و أحدث مني {وَ فَوْقَ كُلِّ ذِي عِلْمٍ عَلِيمٌ}
اللهم اجعلها معلومة من باب علم ينتفع به وفي ميزان حسناتي
