هناك مجموعة من الأطعمة والمشروبات تعتبر ممنوعة على طفل قبل إتمام العام الأول وهي، (السكر، العسل ، الملح).
طب إيه البديل ؟ الفواكه و العصائر هي أصلاً طعمها حلو مش محتاجة حتى و هى مطبوخة أو مسلوقة و كدة كدة حاسة تذوق الحلو ما بتبقاش لسة نمت عند النونة أوي ،، طب و الملح !!؟؟ ممكن شعرة كمون خفيفة على الأكل المطبوخ.
* فيه شوية مأكولات بالرغم إنها مهمة لكن لازم تبقى بحرص و متابعة لكن مش ممنوعة ؛ (منتجات الألبان ، البيض ، الفول و البقوليات) و ده علشان ممكن فيه بعض النونات عندهم استعداد لحساسية منهم فتبدأ معاهم كميات صغيرة نجرب الأول و الفول علشان بعض الأولاد تحديدًا ممكن يكون عندهم أنيميا الفول و وهذه حالة يتم اكتشافها بالصدفة برضو نجرب واحدة واحدة يعني ممكن فولاية واحدة في أول مرة و نزود كل مرة فولاية، لكن البنات مفيش مشكلة بالنسبة لهم من أكل الفول أكليهم براحتك.
* من المفضل إن في الأول التغذية ندخل أكلة واحدة في الأسبوع الأول و أكلة تانية في الأسبوع التاني يعني بمعدل أكلة واحدة كل إسبوع و بعد كدة عادي ممكن ندخل أي نوعية مع بعض.
* الأصل في التغذية هو لبنك إنتي يعني لو قولنا النونة هيبقى ليها من ٨ إلى ١٠ وجبات غذائية في اليوم يبقى ثديك على الأقل ٦ مرات، و كل ما تقدري تنظيم مواعيد الرضاعة يبقى كويس جدًا يعني حوالي كل ساعتين مثلًا.
* خلّي بالك مادام النونة أكل يبقى لازم يشرب مياه، لإن الرضاعة الطبيعية لوحدها كانت بتوفر أكل و شرب، لكن الأكل الخارجي محتاج مياه علشان يساعد على الهضم و ما يتسببش في إمساك و كمان الطفل هيبدأ يشعر بالعطش علشان كدة لازم نبدأ نشربه أول لما نأكله،، المياه ممكن معدنية أو مياه مغلية و تم تبريدها،، "بلاش مياه من الفلتر.
* أخر نصيحة قبل ما نقول نوعيات الأكل ؛ الهدف من أكل النونة إنه يتغذى و يكبر مش يتعذب و يكرهك !! علشان كدة حاولي تخلي وقت الأكل بتاع النونة وقت للمتعة و تكوني مُهيئة نفسيًّا قبل قعدة الأكل دي و بالهنا و الشفا.
يلا بينا على البوفيه قصدي الأكل
د. خالد مقلد
أخصائي طب الأطفال
