تكملة لسلسة مقالات "النونة هتاكل ايه"، نتناول في هذا المقال البوفيه الخاص بطفلك كيف سيكون مع بداية الشهر السابع، وعندما أتكلم عن اسم الشهر فأنا أقصد أول يوم فيه..
#الشهر_السابع:
(١) ماء الأرز أو ماء القمح، و هنا ناس كتير بتفهم غلط إنها بعد ما تسلق الأرز أو القمح نصفيهم و نشربه الميه بس !! لأ مش كدة هنسلقهم و نهرسهم في الميه بتاعتهم و نقدمهم وجبة زي إللي بتتباع في الصيدليات بس أحسن طبعاً و طازة و عمايل إيديكي و حياة عينيكي ،، ملحوظة بس القمح خلي بالك من قشره تنقيه كويس قبل السلق و لو تعرفي تصفيه صفيه علشان النونة ما تشرقش.
دايماً بأبقى ميال إن ما إتعبش الأم في عمل أكل مخصوص و كمان لا أرهق جيب الأب في المصروف فأنصح بأكل موجود في البيت زي ؛
لبابة العيش الفينو ،، الحشو إللي جوة الرغيف بس لازم يكون طازة و طري و بعدين تعملي منه كور صغيرة و تحطيها في جنب خد النونة من جوة هتبوش مع الوقت و هيبلعها و مغذية جداً و فيها قمح و خميرة.
أو جبنة نستو أو كيري و برضو تكوريها و تلزقيها في خده من جوة.
أوموز مهروس نُص موزاية كدة مش كتير في الأول.
أوعصائر ممكن برتقال فريش مفيد و غني بفيتامين سي و بيسهل عملية الإخراج لو فيه إمساك.
أو شوية فول مهروس برضو حلوين على الفطار مفيش مانع بس زي ما قولتلك فولاية أول مرة و بعد كدة نزود بالنسبة للفول عادي مفيش قلق على البنات.
أووش علبة الزبادي بنسميه "شرش" مهم و مفيد.
أو السوائل الدافئة العشبية كلها مباحة ماعدا اللبن علشان لا يتعارض مع الرضاعة ،، و طبعاً الشاي و القهوة .
#الشهر_الثامن: كل ما سبق و نزود عليه ،، مش معنى إن فيه مينيو جديد نلغي المينيو القديم!!.
(١) بطاطس مهروسة أو بوريه و هنا بقى هنزود شعرة الكمون.
(٢) الزبادي و كامل الدسم عادي و بالفواكه عادي.
(٣) شوربة خضار فيها بطاطس و كوسة و جزر و بصل بس تبقي تشيلي البصل قبل الأكل ،، و تخلي بالك الكوسة بتسيب البطن شوية لو النونة بطنه سايبة جاهز بلاش كوسة و نزود الجزر يمسك البطن.
(٤) عصير التفاح نقدر ندخل بيه دلوقتي و ممكن مشمش مسلوق.
#الشهر_التاسع: كل ما سبق و نزود عليه؛
(١) صفار البيض و لازم يكون مسلوق كويس جداً مش نُص سوا ولا ني في ني و نفصله كويس عن البياض ،، البياض لسة شهرين عليه.
(٢) كبدة الفراخ مسلوقة كويس جداً و يا سلام لو بتاعة فراخ بلدي تغذيتها سليمة و تبقي مشترياها طازة يعني مش تروحي تشتري من الفرارجي كيلو كبد و كدة ،، أساساً كبدة واحدة هتأكليها له في يوم كامل و مرة أو مرتين في الإسبوع ،، غنية جداً بالڤيتامينات.
(٣) الحلو چيلي بالموز.
(٤) عصير الرومان جه وقته بقى علشان الحديد يا سلام ع حلاوته.
#الشهر_العاشر: كل ما سبق و نزود عليه؛
(١) قطع صغيرة جداً من السمك المشوي بعد ما نشيل الجلد و الشوك و تركزي أوي في الشوك دي بلاش سرحان ،، أكلة السمك تفضي ليها نفسك.
(٢) نساير فراخ على وش شوربة الفراخ أو الخضار ،، الناس كلها بتقول صدر الفراخ أنا بأشوف إن الأوراك لحمها أطرى و سهل المضغ و البلع ،، عالعموم شوفي النونة هتحب إيه أكتر و إديه منه.
(٣) ممكن توست طري و نعمله بالجبنة و نقطعه حتت صغيرة.
(٤) الحلو مهلبية مش كاسترد ،، تمام
#الشهر_الحادي_عشر: كل ما سبق و نزود عليه؛
(١) الشوفان وجبة غذائية غنية و مهمة جداً للنونة و له وصفات كتيرة لعمايله ممكن مهلبية و طرق تانية دوري إنتي بقى و إتفنني.
(٢) الخضار مطبوخ عادي بقى بس بلاش مسبك ولا مفلفل
(٣) بياض البيض و زي ما قولنا نركز معاه علشان لو فيه حساسية عند النونة من البيض ،، واحدة واحدة.
(٤) السالمون و التونة علشان نديه أوميجا بقى و نطلع أذكية و شُطار.
(٥) أرز و ملوخية و عليها فراخ و طبعًا دي أكلتك المفضلة و مستنياها من أول المقال،، بس نخلي بالنا بتسيب البطن شوية.
(٦) العصير ممكن أي فاكهة تعصريها أهم حاجة بدون سكر.
#الشهر_الثاني_عشر: كل ما سبق و نزود عليه؛
(١) ممكن نأكل عيش بلدي بتاع الفرن عادي بس أهم حاجة طازة و طري.
(٢) الجبنة بكل أنواعها.
(٣) المكرونة المسلوقة فقط مش مسبكة و الكشري لسة شوية ،، في أولى إبتدائي علشان قبل كدة هيسألك يعني إيه كشري ؟ مش هتعرفي تجاوبي لكن لما يروح المدرسة هيكون عرف من أصحابه.
(٤) كل أنواع الفواكه و الخضروات شرط تكون طازة و طرية و جيدة التنظيف مهم جداً النظافة عموماً في الأكل لكن مع الفواكه و الخضروات إضربي الأهتمام في مليون و بالذات فواكه الصيف بلاش الحباية الضاربة.
#إتمام_العام_الأول
🎊🎈🎉❤️كل سنة وهو طيب❤️🎉🎈🎊
يقعد معاكم ع السفرة خلاص بقى راجل أد الدنيا ملو هدومه أو عروسة زي القمر ربنا يحميهم.
اللهم أجعلها معلومة من باب علم ينتفع به وفي ميزان حسناتي
