يلا بقى كل واحدة مستنية خبر سعيد أو خلاص أوشكت على الولادة أو لسة والدة تسيب إللي في إيدها و تقرأ الكلمتين دول.. الحكاية #٦_نصائح في #٦_دقائق يريحوكي #٦_شهور.
١- #الرضاعة الطبيعية ؛ أوعى تفكري أبداً في أي بدائل أو مكملات غذائية أول ٦ شهور إلا لا قدر الله لو اللبن نشف خالص في ثديك، اللبن بيبقى في الأول قليل بنسميه السرسوب (Colostrum) مفيد جداً للمناعة وتهيئة الجهاز الهضمي للنونو، و ماتقلقيش و تفتكري لبنك خفيف لكن هيتقل و يزيد مع الوقت.
كل لما هترضعي النونو اللبن هيزيد في ثديك،، لازم ترضعي بالتبادل من الثديين يعني بلاش تركزي مع ثدي واحد و تسيبي الثدي الثاني، يُفضل تفضي الثدي الأول قبل ما تنقلي على الثدي الثاني و بالتناوب.
وضع الرضاعة السليمة لازم الأم تبقى قاعدة مش نايمة حاضنة النونو في مواجهتها و العين في العين و النونو مائل بزاوية ٤٥ درجة علشان النونو لا يشرق ولا لا قدر الله يتخنق،، مفيش التهريج بتاع أنا نايمة و أطلع ثديي أحطه في بق النونو و خلاص!،، مفيش أي أكل ولا مياه أول ٦ شهور، حصرياً رضاعة طبيعية.
البديل الوحيد
لا قدر الله في حالة استحالة الرضاعة الطبيعية لأي سبب، فالبديل الوحيد اللبن الصناعي لا غير مفيش داعي لأي وصفات ممكن تلخبط الجهاز الهضمي و المناعي للنونو،، و ده طبعاً يبقى تحت إشراف الطبيب لاختيار نوع اللبن المناسب لكل نونو.
٢- #التكريع ؛ لازم مع كل رضعة ماتفوتيش رضعة بيبقى بالهدهده على ظهر النونو بشويش في نُص ضهره و حضناه، ذقنه على كتفك لحد ما يتكرع،، فيه نونو يتكرع بسرعة و نونو يطول شوية لازم تصبري لحد التكريعة،، فوائد التكريع أنه يمنع:
(١) الغازات و المغص و دي أسوء حاجة هتنغص عليكي عيشتك
(٢) البكاء المستمر
(٣) إنسداد الأنف أو الخنفرة
(٤) إلتهابات الأُذن الوسطى
(٥) القشط الكتير أو القئ
(٦) الشبع الكاذب
عارفين القُلة!؟ حد فيكن ملت قُلة قبل كدة ؟؟ لما بنيجي نملأ القُلة المياه بتوصل لأخرها برغم إنها لسة فاضية من جوه لما نهزها شوية المياه تبئلل و تنزل جوة القُلة و نرجع نكمل ملئها علشان كدة أحيانًا أنصح بالتكريع وسط الرضعة و ليس في أخرها، بالمناسبة بيبقى فيه زُغطة متكررة عند النونو دي عادي ما تقلقش و دليل إنه بيشبع و بيهضم كويس و كانوا يقولوا عليها شعبيًا بالبلدي بتوسع "أمعاء البطن".
٣- الإخراج ؛ أول كام يوم بيبقى ال Stoolلونه أسود و ده بيسموه شعبياً أسف في الكلمة "ديرتي البطن" وبعد يومين من الرضاعة بيبقى طحيني مخضر و بيبقى مع كل رضعة تقريبًا و ده عادي مش إسهال و بعد حوالي شهر بيبدأ يمسك نفسه ويبقى إخراج كل ٣ أيام و متماسك و لونه أغمق شويه و ده برضو عادي مش إمساك ،، لون ال Stoolممكن يتأثر بنوعية أكل الأم نفسها،، أوعي و منعًا باتًا الإفراط في إستخدام لبوس جلسرين أو ورقة بزيت لو الطفل إتأخر في عمل البيبيي،،
لإن النونو ممكن يتعود عليها و ما يعملش بيبيي من غيرهم تاني، لكن نزود الرضاعة عادي و أخرنا إسبوع أو ٨ أيام لو طول عن كده لازم دكتور يشوف النونو.
لو الدكتور مش متوفر ممكن نديها ملعقة صغيرة مؤقتًا من دواء إسمه لاكتيلوز و ده لو بعد ١٠ أيام إمساك مع الرضاعة الكويسة،، الأم لو عندها إمساك أو إسهال أو القولون العصبي هيأثر ع النونة الصغنونة علشان كدة الأم أول ٦ شهور بالذات تراعي ربنا في أكلتها و نونتها.
أما التبول فالمعدل الطبيعي من ٦ إلى ٨ مرات يومياً و بتقل من شهر لشهر و بتتأثر بعوامل الجو يقل في الحر و يزيد في البرد
٤- النوم ؛ بيبقى ملخبط جداً و الأم بتعاني جداً مع النونة لكن مجبرة تأقلم نفسها علشان الأم تعرف تنام و ما تتجننش و طبعاً لو إتجننت جنانها هيطلع ع الزوج مش ناقصين نكد ،، نصيحة كدة للزوج مرتبته الحلوة و مخدته القطقوطة و ينام في الصالة علشان يعرف يروح شغله و تلاقوا تأكلوا إنتي و النونة ،، للأسف لخبطة النوم دي أول سنة لحد ما الطفل يبدأ يأكل كل حاجة و يمشي و يتعب يبدأ ينام نوم متصل بالبلدي كدة "دماغه تتقل".
ساعات النوم
الطفل المولود بينام حوالي ١٦ ساعة متقطعة يومياً ممكن ساعتين ساعتين و بالليل من ٤ إلى ٦ ساعات متصلة.
5- المناعة؛ لازم النونو تشوفه الشمس و الهواء و طبعاً الكلام ده هيفرحك جداً و هتجري ع جوزك تقولي له يلا خرجنا يا بابي علشان النونة تتقوى، طبعاً هو بحمشنة الراجل الشرقي هيرد بكلمة ورد غطاها "عندك البلكونة".
نقلع النونة هدومها في الصيف ماعدا البامبرز و نخبي وش النونة و نحط النونة في الشمس حوالي ١/٤ أو ١/٢ ساعة يومياً الساعة ١٠ صباحاً ،، و في الشتاء تبقي بالفانلة النص كم و الشورت لو الجو كويس و لو الجو برد مش لازم اليوم ده ،، طبعاً أول ما زوجك هيقولك عندك البلكونة هتأخدي شنطتك و النونة و على بيت مامتك طبعاً مش علشان حاجة غير إن بلكونتها أوسع و بتدخلها الشمس ،، و ممكن ندي النونة فيتامين د من دلوقتي تركيزه ٤٠٠ وحدة دولية في اليوم ده بيقوي المناعة و كمان بيمنع لين العظام.
٦- التطعيمات الإجبارية ؛ لازم الإلتزام بكل التطعيمات الإجبارية في الوحدة الصحية و في مواعيدها بالضبط و هى كافية جداً لحماية النونة من أمراض كثيرة سيئة ،، و هناك أيضاً بعض التطعيمات الاختيارية الإضافية زي تطعيمات الإلتهاب الرئوي و الجديري المائي و الروتا بتاع الإسهال و دول مش موجودين في الوحدة الصحية بس بشرط إستشارة الطبيب مش من تلقاء نفسك كده.
النصائح دي تمشيكي أول ٦ شهور مستريحة و لنا لقاء أخر إن شاءالله عند إتمام ال ٦ شهور أقولك تبدأي تأكلي النونة إيه ،،؟
آللهم اجعلها معلومة من باب علم ينتفع به و في ميزان حسناتي.
